Акафист пресвятей Богородице в честь иконы Ея «Отрада» («Утешение»)
Кондак 1
Взбранных сил небесных радость и хваление, всего же рода человеча исправление, Тя ублажаем, пречистая Дево, Ты же, упование единое наше, душам низпосли благодатно отраду, да поем таковая Ти, образ Твой чтуще:
Радуйся, Божия Мати, Невесто нетленная, светлая наша отрадо.
Икос 1
Ангелов лицы дивятся, образ афонский Твой зряще, на немже, пречистая Мати и Дево, от уст своих чистых рукою десною десницу Младенца отводиши кротко. Что сие образа знамение? Мы же речем, таковая:
Радуйся, Дево, Всевышняго Мати;
Радуйся, дивный раю благодати.
Радуйся, наша отрадо небесная;
Радуйся, людем надеждо известная.
Радуйся, лик Твой спасение всей земли возвещает;
Радуйся, взор Твой, пребывающих во тли утешает.
Радуйся, свете небесный, мглу наших дней озаряяй;
Радуйся, цвете нетленный, дел наших тлен оживляяй.
Радуйся, Ты бо молитвы к Сыну твориши;
Радуйся, аки светильник в молитвах гориши.
Радуйся, радостно Ти восклицаем;
Радуйся, песненно Тя воспеваем.
Радуйся, Божия Мати, Невесто нетленная, светлая наша отрадо.
Кондак 2
Недоумеет ум дольний тайну сию разумети, Пречистая Дево, како Ты в лоно приимше безсеменно, действием Духа Святаго, Отчее Слово, Богочеловека миру родивши и воспевати велишь Ему песнь: Аллилуия.
Икос 2
Гору Афонскую, Мати и Дево, дивно покровом Своим осеняющи, присно храниши от бед и напастей. Где Благодатных икон чудесами святыя обители славятся, и преподобными гласы, Ти непрестанно взывают:
Радуйся, Дево, отрадо в печалех;
Радуйся, в скорбех скоропослушнице.
Радуйся, сущим в пути Одигитрие;
Радуйся, храмов священных вратарнице.
Радуйся, добрая вестнице в беде унывающим;
Радуйся, всех утешение к Тебе притекающим.
Радуйся, бедным богатство, елеоносная Жено;
Радуйся, чтущим акафист благоволящая тайно.
Радуйся, рекшая старцу, «Радуйся», чудно;
Радуйся, живоприемная Мати. Радуйся, мы бо по долгу Тя ублажаем.
Радуйся, есть бо достойно Тя пети;
Радуйся, Божия Мати, Невесто нетленная, светлая наша отрадо.
Кондак 3
Евину гордую прелесть, Девы смиренное «Буди», в очах Милосерднаго всю упраздняет: Сын Божий, Сын Девы бывает и Бог неприступный живет с человеки, темже и мы немолчное пение устнами возслем: Аллилуия.
Икос 3
Ликостояще над морем, светом молитвы сияют пред Богом святыни Афона, и явно, Божия Мати, их главы осеняет, на всяк час пустынников всех призывающи к хвалебному пению, поюще Ей тако:
Радуйся, славо пустынь вожделенных;
Радуйся, чудо высот поднебесных.
Радуйся, гор и холмов осенение;
Радуйся, скал и стремнин освящение.
Радуйся, в страны небесныя Еюже путь открывается;
Радуйся, Еюже верным рай отверзается.
Радуйся, крине в юдоли плачевной, благоуханная радосте;
Радуйся, лилие в поли, приснотекущая сладосте.
Радуйся, света восточе, долы земли озаряяй;
Радуйся, жизни поточе, воду живую являяй.
Радуйся, гласе немолчных молений;
Радуйся, щите священных селений.
Радуйся, Божия Мати, Невесто нетленная, светлая наша отрадо.
Кондак 4
О человечестем роде, еже спасти ны, о Дево, в молитвах пред Сыном сладчайшим стоиши; о Мати, людем отрадо благая, Ты видиши бездну грехов наших лютых, мы же, поверженни в рове истленья, горе не смеем взирати и петь: Аллилуия.
Икос 4
Ватопеда обитель святая славится образом чудным, ему же есть древнее имя Отрада. О нем бо предание старец блаженных дивную повесть хранит благодатно, да слышаще ю, ко Пречистей Заступнице вси поем тако:
Радуйся, мира благая отрадо;
Радуйся, верным стено и оградо.
Радуйся, чудо чудес несказанное;
Радуйся, небо небес осиянное.
Радуйся, безмолвных обетов краю желаний;
Радуйся, безмятежия ищущим раю желанный.
Радуйся, яко Тобою душа оживает;
Радуйся, яко Тобою мертвенный ум воскресает.
Радуйся, веры горнило, имже неверие тает;
Радуйся, тайная сило, яже от тли возставляет.
Радуйся, славо отшельников твердых;
Радуйся, крепосте иноков бодрых.
Радуйся, Божия Мати, Невесто нетленная, светлая наша отрадо.
Кондак 5
Рождшая жизнь всему миру, рождшая милости бездну, о Дево Пречистая, оком яснейшим наших печалей пучину Ты зриши, слышиши гласы земных воздыханий, скоро на помощь к нам притекающи, и Всеблагому учиши нас петь: Аллилуия.
Икос 5
Дерзко разбойницы, алчуще злата, в нощи облагают святую обитель, да врат отворенным заутра, убивше монахов, святыни расхитят. Ты же, Заступнице, Свой удел защищаеши, да присно поет Тебе тако:
Радуйся, Ватопеда святая отрадо;
Радуйся, вражиим кознем преградо.
Радуйся, замыслов злых обличение;
Радуйся, лютых врагов отражение.
Радуйся, Ты бо не спиши, и удел Свой спасаеши;
Радуйся, тучи вражиих стрел отвращаеши.
Радуйся, крепосте, святость икон Твоих чтущих;
Радуйся, столпе, чудес Твоих многих поющих.
Радуйся, кротких победо и поражение гордых;
Радуйся, правых защито и посрамление лживых.
Радуйся, Ты бо заблудших кормило;
Радуйся, Ты бо святое молитвы кадило.
Радуйся, Божия Мати, Невесто нетленная, светлая наша отрадо.
Кондак 6
Девственный взор Твой, Мати благая, потоки любви и щедрот изливает: Ты нас храниши в исходех и входех, спасаеши верных на суши и в мори, аще лишь токмо искра покаяния в сердце возникнет, еже петь: Аллилуия.
Икос 6
Молитвы в час утра свои совершивше, в келии иноцы вси отъидоша, лишь в храме игумен един бе моляся, и от иконы Твоея Утешенье глас дивно услыша: «Врат днесь не вскрывайте». Ятый же трепетом старец взываше:
Радуйся, Дево — стража святыни;
Радуйся, Ты еси дом Твой спасаеши ныне.
Радуйся, щите заутра и нощию;
Радуйся, грозная силою многою.
Радуйся, Ты бо щадиши нас грешных;
Радуйся, варвары Ты поражаеши.
Радуйся, венче надежды и знаменье мира;
Радуйся, жезле победы, обетование славы.
Радуйся, камне сапфире — подобие неба;
Радуйся, светлый престоле и колеснице Царева.
Радуйся, глас Твой нам сладок ушима;
Радуйся, образ бо Твой зело красен очима.
Радуйся, Божия Мати, Невесто нетленная, светлая наша отрадо.
Кондак 7
Сын Человеческий близ есть при дверех и Суд Его Страшный — вещает Писанье, обаче вси нерадим о кончине, лениви бо суще, и грозным глаголом не внемля, не вем Богу петь: Аллилуия.
Икос 7
Трепетно старец игумен ко образу взор свой возводит: се лицы пред ним оживают, и грозный Младенец Деве глаголет, рукою десною уста заграждая: «Не вещай, да накажутся, Мати». Ужасеся бо старец тако Пречистей глаголя:
Радуйся, Дево, Владычице мира;
Радуйся, неба Царице благая.
Радуйся, гнев Божий Ты утоляеши;
Радуйся, суд грозный Его Ты отвращаеши.
Радуйся, Мати всемилосердная;
Радуйся, помоще всем благодатная.
Радуйся, печали бо Ты отгоняеши;
Радуйся, болезни нас грешных врачуеши.
Радуйся, аки утро, тихий свет проливаеши;
Радуйся, хладныя души Ты возгреваеши.
Радуйся, чудная Отроковице;
Радуйся, дивная Богоневесто.
Радуйся, Божия Мати, Невесто нетленная, светлая наша отрадо.
Кондак 8
Единомысленно, Дево, взоры к Тебе обращаем, нас бо в день судный в молитвах Ты не оставиши; простри нам щедрую руку, падохом грехми бо до бездны, и кто нас избавит от муки грядущей, кто пети воздвигнет всех нас: Аллилуия.
Икос 8
Кротко десницу, Мати Святая, Богомладенца отводит, и мало лик отклоняющи, старцу тако глаголет: «На стены братия вси да выходят, и лютых разбойников да отражают!» Старец же братию скоро глашает и, видевше чудо, вси воспевают:
Радуйся, Мати благая Христова;
Радуйся, тихой пустыни покрове.
Радуйся, Свет бо превечный родившая;
Радуйся, Огнь ипостасный неопально носившая.
Радуйся, имам бо Тя необоримую стену;
Радуйся, вемы бо Тя милости бездну.
Радуйся, всех херувимов честнейшая;
Радуйся, всех серафимов славнейшая.
Радуйся, Божия Мати, Невесто нетленная, светлая наша отрадо.
Кондак 9
Иов, страдалец пред Богом, мудренно нас поучает, глаголет бо: се, благочестие — мудрость, и благо всем уходящим от мира, сладостный подвиг молитвы подъявшим, их же в молитвах Пречистая Дево всегда укрепляет и помогает им звать: Аллилуия.
Икос 9
Радостно в храме сем зряще список с иконы Отрады — афонских обителей дар драгоценный, в молитве мысленно соединимся с хвалебными лики отцев — святогорцев, еже пети Пречистую нас приглашают:
Радуйся, стран и народов святыне;
Радуйся, всех христиан благостыне.
Радуйся, Огнь во утробу приявшая;
Радуйся, Слово во плоти явившая.
Радуйся, облаче света, в сей мир Христа нам принесшая;
Радуйся, лествице, нас к небесам возводящая.
Радуйся, алчущим — сладкая пище;
Радуйся, жаждущим — новое пиво.
Радуйся, свет вышний с Небес – верным путь озаряющий;
Радуйся, тучная ниво, души всем веселящая.
Радуйся, тихая ангелов славо;
Радуйся, людем благая отрадо.
Радуйся, Божия Мати, Невесто нетленная, светлая наша отрадо.
Кондак 10
Ум к небесам утремивше и чувства вознесше над тленом, о, коль вожделенно спастися, имуще надежду благую на Бога. Ты нам помогай, Пресвятая, на путь правый нас наставляя, Всевышнему петь: Аллилуия.
Икос 10
Образ честный провожая в покров благодатный обители новой, в залог небесныя помощи граду, честный схимонах святогорец вещает: Се мира Владычицы благословение! Молитеся, веруйте и пойте Ей тако:
Радуйся, Ты нам покров благодатный;
Радуйся, Ты нам залог упований.
Радуйся, сущим в бедах утешенье;
Радуйся, сущим в грехах умиленье.
Радуйся, в час Божия гнева сердца укрепляеши;
Радуйся, в дни испытаний умы умудряеши.
Радуйся, злые наветы от нас отвращаеши;
Радуйся, в бедах не до конца погубляеши.
Радуйся, в безбожное время Ты единая пристань;
Радуйся, прелестей ложных избавляеши присно.
Радуйся, в жизни нам тихая радосте;
Радуйся, в вечности райская славо.
Радуйся, Божия Мати, Невесто нетленная, светлая наша отрадо.
Кондак 11
Силою, славою в мире сем тленном темныя силы владеют, и света Христова познати не могут, но верным токмо молитва есть сила, им слезы — залог и победы, и славы. О Дево и Мати, даждь тучу нам слезную и бодренный ветр возвей нам поющим победную песнь: Аллилуия.
Икос 11
Радость на лицах сияет, глас вопиет от Афона: Владычица шествует к вам, исходите, сретайте Деву небес со свещами, сретайте же Ю с умиленья слезами и празднуя светлым гласом воспойте:
Радуйся, Ты еси кивот освященный;
Радуйся, Ты еси престол вознесенный.
Радуйся, горних чинов воспевание;
Радуйся, адовых сил трепетание.
Радуйся, верных сердца веселиши;
Радуйся, Ты бо спасение душам совратившимся.
Радуйся, глас Твой пресладкий нам вечную радость вещает;
Радуйся, взор Твой претихий нам тишину обещает.
Радуйся, Сына и Бога Ты умоляеши;
Радуйся, райских чертогов нам дверь отверзаеши.
Радуйся, храмино Духа Святаго;
Радуйся, скиние Бога живаго.
Радуйся, Божия Мати, Невесто нетленная, светлая наша отрадо.
Кондак 12
Ангельски днесь воспеваем, песнь благодатней Марии: Сия бо есть сладость, и рай, и блаженство, отрада в час испытаний и гнева, надежда блаженств безконечных по смерти. Радуйся убо, Заступнице наша, и радость подай, Богу петь: Аллилуия.
Икос 12
Да защитит Богомати, образом дивным Отрады, молитвы оплот — монастырь сей и храмы. Да не угаснет во век свет лампады пред ликом спасительным Богоневесты, сонм же монахов с миряны гласом немолчно взывают:
Радуйся, храме, светлейший Сиона;
Радуйся, свете и славо Афона.
Радуйся, иноков мысль непрестанная;
Радуйся, девственных песнь неумолчная.
Радуйся, росу утешения Ты во дни посылаеши;
Радуйся, слезы умиления Ты в нощи исторгаеши.
Радуйся, дивное имя, чудотворящее в тайне;
Радуйся, Божие миро, в сей мир излиянное.
Радуйся, яко Тобою льется свет бесконечный;
Радуйся, яко с Тобою выну Младенец предвечный.
Радуйся, светлосте людем, Тя чтущим;
Радуйся, радосте нам, Тя поющим.
Радуйся, Божия Мати, Невесто нетленная, светлая наша отрадо.
Кондак 13
О всепречистая Дево, сладчайшаго Сына нетленная Мати! От бед и скорбей огради нас, вечныя муки избави. И в будущем веке воспети сподоби хвалебную песнь: Аллилуия.
Сей Кондак читается трижды, затем 1-й Икос и 1-й Кондак.
Икос 1
Ангелов лицы дивятся, образ афонский Твой зряще, на немже, пречистая Мати и Дево, от уст своих чистых рукою десною десницу Младенца отводиши кротко. Что сие образа знамение? Мы же речем, таковая:
Радуйся, Дево, Всевышняго Мати;
Радуйся, дивный раю благодати.
Радуйся, наша отрадо небесная;
Радуйся, людем надеждо известная.
Радуйся, лик Твой спасение всей земли возвещает;
Радуйся, взор Твой, пребывающих во тли утешает.
Радуйся, свете небесный, мглу наших дней озаряяй;
Радуйся, цвете нетленный, дел наших тлен оживляяй.
Радуйся, Ты бо молитвы к Сыну твориши;
Радуйся, аки светильник в молитвах гориши.
Радуйся, радостно Ти восклицаем;
Радуйся, песненно Тя воспеваем.
Радуйся, Божия Мати, Невесто нетленная, светлая наша отрадо.
Кондак 1
Взбранных сил небесных радость и хваление, всего же рода человеча исправление, Тя ублажаем, пречистая Дево, Ты же, упование единое наше, душам низпосли благодатно отраду, да поем таковая Ти, образ Твой чтуще:
Радуйся, Божия Мати, Невесто нетленная, светлая наша отрадо.
Молитва
О Прествятая Владычице Госпоже Дево Богородице, Невесто нетленная, Мати благословенная, светлая наша отрадо, вожделенное утешение! Приими ныне дерзновенное и неотступное моление сие, от грешных устен и недостойных душ Тебе приносимое пред святым и светозарным Твоим образом.
Пощади ны, милостивая и милосердная и щедролюбивая наша заступнице, и не предаждь нас суду и гневу Сына Твоего и Спаса нашего, Господа Иисуса Христа, Емуже без конца согрешаем, и повинни есьмы осуждению и праведному Его изречению, да накажемся по грехом нашим, превозшедшим всякую меру Его долготерпения. Приникни с высот Твоих горних, идеже ангели трепетно славят Тя, и воззри на нашу дольнюю нищету: како обнищахом верою, како бедствуем надеждою и оскудехом любовию, како умом омрачихомся, сердцем же и чувством ожесточихомся. Уврачуй нас молитвою Твоею, Дево целебнице. Возстави ны, падшия духом, укрепи разслабленныя умом, возбуди унылыя и отчаянныя, исцели болящия душею и телом. Призри на град наш и пощади его, Божий отводящи, Твоим предстательством, гнев. Укроти гордостная стремления людей и богоотступная их шатания. Возвей тихое дыхание благодати Твоея на смятенныя души и сокрушенная сердца. Сохрани супружеством чистоту, материнству честь, девству благословение. Низпосли под кров жилищ наших освящающий луч божественнаго света, да обличатся деяния неподобная и устыдятся речи хульныя, и укротятся мысли злобныя. О миролюбивая, благостнейшая и тишайшая Дево Мати, о падениях наших скорбящая, о спасении нашем воздыхающая! Утоли церковныя бури, умири расколы и распадения, собери расточенныя, обрати отпадшия и всех приведи в единение Святыя Церкве, да единодушно и единомудренно славится на земли, якоже и на небеси, единое святейшее и спасительное имя Единосущныя Троицы, Отца и Сына и Святаго Духа, во веки веков. Аминь.
История иконы «Отрада и Утешение»
У нас в храме есть икона Богородицы «Отрада и Утешение» История её очень удивительна. Она вещала от такой иконы игумену Ватопедского монастыря на Афоне, чтобы иноки утром не открывали врат обители, но поднялись на стены монастыря и отразили разбойников. Во время, когда Она говорила это игумену образа на иконе пришли в движение и Богомладенец, простирая свою руку, закрывал Ей уста при этом говоря: «не вещай, пусть накажутся за грехи свои», но Богородица чуть отклонившись, и отводя Его руку сказала то же самое. Благодаря этому событию иноки, не отворив врат обители, остались живы. Мы молились перед таким образом (еще до того как у нас он появился), читали акафист и просили, когда у нас в Лисаковске хотели строить вакциновый завод, чтобы его не построили, милостью Божией и предстательством Богородицы это намерение не осуществилось. После этого нам захотелось, чтобы и у нас в храме была такая икона. По Божией милости, через благодетелей, она у нас теперь есть, чтобы молящиеся перед ней Богородице по вере получали Её благодатную помощь и заступление.
